Monday, February 25, 2008

الحمص ومشاعر الآخرين




ودانا ولد الخال خوش مطعم حمص وفلافل بالرياض

صراحة الحمص مو طبيعي والفلافل بعد

يعني المطعم بشكل عام مية مية

السيرفس سريع وعجيب والخضرة شغل عدل وطازة

والعجيب بالمطعم ان اسمه حمص النقاء

مادري هل ذلك لأن الحمص مصفينه بفلتر ولا مسويله معالجة ثلاثية
الله اعلم
والأعجب من ذلك الورقة اللي حاطينها في المغاسل

واللي ماتحتاااج لأي تعليييييق

:)))



Thursday, February 21, 2008

logistic? منطق؟



احد يفسرلي شنو يعني المكتوب على الشاحنة؟


انا وقفت مدة وحاولت أفسر المكتوب لكن وقف مخي جدامها .!؟


هذي الصورة صورتها اثناء طريقنا للعمرة في صيف 2007




اضغط على الصورة للتكبير


انت المذيع ؟؟

جم واحد وده يسوي راديو على الانترنت؟
ماودك يكون لك محطة شخصية
وتتحكم فيها على كيفك؟
انت الديجي وانت المذيع وانت المخرج وانت المعد وانت اللي تصب شاي وانت بتاع كله
وفوق هذا كله ببلاش
و اذا توفقت يمكن تبيع اعلانات بعد
%% بس لا تنسانا من النسبة %%
:))
ميزة راديو الانترنت انه من الممكن الاستماع له عن طريق التلفون النقال - الجوال - وذلك عن طريق ال
GPRS - أو - EDGE
باستخدام برامج خاصة للنقال ومتوفرة بالمجان بالنت
الطريقة سهلة وبسيطة
الفكرة تنقسم لقسمين
الجزء الأول :
السيرفر - أو البرنامج الخادم -
الجزء الثاني :
برنامج البث - الديجي -
ميزة برنامج البث انك ممكن تبث من أي مكان مو شرط تكون على نفس السيرفر
والسيرفر متوفر بنسختين للوندوز واللينكس
طبعا نسخة اللينكس أفضل لأن اللينكس أثبت
بس الوندوز ماعليه خلاف يمشي حاله ويؤدي الغرض
لتحميل البرنامج وخطوات الشغل
الخطوات سهلة عالآخر
انا مجرب البرنامج هذا ومسوي كذا محطة من سنة الطفحة
:)
من سنة 2000 تقريبا اذا ماني غلطان
وجربت الوندوز واللينكس
طبعا سيرفر اللينكس ماعليه كلالالالالام
:)

الخطوات مشروحة بالتفصيل الممل بالصفحة الخاصة بالبرنامج واللي عنده استفسار يسأل وانا مستعد كالعادة للاجابة
واللي يبي نسويله محطة يعزمنا على عشا ويستاهل :)
------------------------------------
تنبيه:
اتمنى ماتستخدم المحطة لمعصية الله سبحانه وكل من ذنبه على جنبه أنا برئ أمام الله سبحانه :)
-------------------------------------

Wednesday, February 20, 2008

الشيخ بو خليل وفتح الخط الدولي؟

تذكرون سالفة الشيخ ابراهيم ويا مكالماته الدايخة بتلفزيون الوطن
اللي يتصل من السنغال ويخربط على هالمساكين
شلون تعرف انه متصل من السنغال؟
تعرف سلمك الله عن طريق الموقع الوحش:
تدخل على الرابط ومن ثم
راح يكون جدامك المستطيل اللي فيه
select a country calling code
اضغط عليه واختار فتح الخط للدولة اللي متصلين عليك منها
مثلا 886
وتضغط على Reverse it
المفروض تطلعلك تايوان
وابحث عن فتح خط دولتك وجرب
وهكذاااا
موقع مفيد في الحالات المستعصية لبعض الناس
:)

Monday, February 18, 2008

أوووش ستليييييييييت :))

ساعات يتليقفون بعض الناس ويخربون عليك الرسيفر علبنه فهامية
أو بعض الناس يدقون على اللي بالجرايد الاعلانية او يروحون لمحلات الستلايت علشان البرمجة ويضربون عليهم مبلغ وقدره
انزين حضرتك ليش ماتسويه بنفسك وتوفر الفلسين حق عشا الربع بالديوانية؟؟
فاللي متوهق برسيفره ويبي يدور على قناة ومايعرف ترددها
ماله الا هالسايتين اللي يجمد عليهم الشارب
والتحديث فيهم يومي
الأول:
الثاني:
الطريقة انك تختار القمر اللي تبيه وراح تلقى المحطة عن طريق الحرف أو الباقة
سهل ومايبيله شي
واللي يسأل مايتوهش
:))

Sunday, February 17, 2008

شرايك تشبك على جهاز الدوام وتسردحها ؟!؟

موقع قنبلة

اذا ودك تدش على جهاز الدوام من البيت او من اي مكان ثاني او من الدوام على جهاز البيت
مالك الا هالموقع
هالموقع ميزته ان الفايروول مال الدوام مايقدر يوقفه
وهذي اهم ميزة
لانه شغال على بورت الويب
وباختصار الطريقة انك تسوي ريجستر
وطبعا بلاش مثل ماتعودتوا يالجعوص
واليوزر نيم الايميل اللي تحطه
وبعدين تدخل وتضيف الجهاز اللي تبي
وراح ينزل برنامج صغنونو بالتاسك تري
مافيه فايروس ولا باكدور
الطريقة بسيطة وسهلة مايبيلها شي صدقوني اسهل منها ماكو
على فكرة الموقع فكرته نفس فكرة بي سي اني وير
بس من الويب
ولا تنسى تختار نوع الاشتراك مجاني free
الا اذا تبي تشتري الخدمات
اللي عنده استفسار يسأل ومايتكسفش

الموقع هو :
http://www.logmein.com/
----------------------------------------------------